Útilegumöst!

Nú er verslunarmannahelgin að bresta á og þá stöffa flestir bílinn af svefnpokum, bjór,  grillmat og sólgleraugum og halda af stað út í móa. Ég er ekki ein af þessu fólki, en langar samt að telja upp nokkra bjútí-tengda hluti sem ég myndi hafa með mér í alvöru útilegu, hvort sem ég væri á leið á útihátíð eða bara út í rassgat með fjölskyldunni minni.

Mér finnst skipta mestu máli þegar ég er að ferðast að taka með hluti sem nýtast sem best, taka sem minnst pláss og minnstan tíma að nota. Ég vil mála mig sem minnst og þurfa sem minnst að gera nema borða snakk og horfa á annað fólk tjalda (Hvað eru mörg ‘minnst’ í því?). En svo situr húðin oft á hakanum í svona ferðum og það bitnar stundum á henni þegar heim er komið.

Ég veit svosem ekki hversu trúverðugur predikari ég er hvað þetta varðar, þar sem ég fór í smá útilegu síðustu helgi og sofnaði með farðann á mér eftir brúðkaup, augnhár og alles. Nú skarta ég þessu líka fína eldfjalli á kinninni og stórsé eftir því að hafa útskýrt muninn á bólu og fæðingarbletti fyrir dóttur minni fyrir nokkrum vikum síðan. Nú bendir hún á mig og segir ‘bólabólabóla’.

Ég er reyndar ekki útilegu’týpan’ og hef yfir höfuð ekkert gaman að því að sofa annarsstaðar en í rúminu mínu. Mér finnst tilhugsunin við það að vita ekkert í hvernig ástandi ég muni vakna daginn eftir afskaplega óhugnaleg. Þ.e.a.s hvort ég vakna á kafi í rigningarvatni eða við það að bráðna. Svo skulum við nú ekki einu sinni ræða köngulærnar og flugurnar sem maður deilir svefnstað með. Þegar maður opnar augun á morgnana lýtur litla mýflugan sem hefur klemmst á milli himins og tjalds út eins og heljarinnar tarantúla. Í ljósi frétta upp á síðkastið tók ég meira að segja ákvörðun um að sofa í sokkabuxunum eftir brúðkaupið, því ég var svo hrædd um að skógarmítlarnir myndu éta af mér fótleggina. Þessa ákvörðun tók ég reyndar eftir nokkra bjóra, en ég er viss um að ég myndi ekki breyta neinu í dag.

 Hvað um það… hér koma nokkrir hlutir sem mér finnst nauðsynlegt að hafa með mér í útilegu!

Nivea sun care – Sólarvörn… á kannski ekki við þetta sumar.

Clearasil Cleansing pads – Sniðugt til að nota á eftir makeup remover þurrkum, því þær hreinsa ekki allt. Þessir eru mjög öflugir.

Garnier face wipes – Mér finnst þetta vera langbestu hreinsiklútarnir. Þeir eru passlega blautir og eiga meira að segja að duga í tvö skipti hver. Ég hef reyndar ekki látið reyna á það, enda alltaf stríðsmáluð. En hreinsiklútar eru möst í útilegur! Þessir eru fyrir normal/blandaða húð.

Mac bronzing powder – Ég nota matte bronze fyrir sem eðlilegast útlit.

Batiste dry shampoo – Þurrsjampó er mesta snilldin þegar kemur að útilegum og maður veit ekki hvar næsta sundlaug er. Batiste býður upp á margar útfærslur og er mjög ódýrt.

Cotton pads – Þeir fylgja mér hvert sem ég fer ef ég er með sér augnfarðahreinsi og toner.

Lancôme hypnose waterproof mascara – Vatnsheldur maskari er auðvitað nauðsynlegur á þessu rigningarpleisi! Þessi er sérstaklega góður.